Тыва Республика хүнүн таварыштыр бистиң бажың-интернадывыстың хоочуннары концертин көргүскеннер

Тыва Республика хүнүн таварыштыр бистиң бажың-интернадывыстың хоочуннары боттарының күжү-биле белеткээн солун концертин көргүскеннер. Ыраажылар Виктор Сат, Данов Серен, Шангыр Ондар, Дарья Ондар, Светлана Сарыг-оол, Сара Шалык боттарының уян чараш үннери-биле ада-чурттун, төрээн Тывазын, ынак авазын, ынакшылды алгаан ырыларны ырлааннар. Чечекмаа Саая аныяанда күүседип чорааны испан болгаш кавказ чоннарының танцы-самын тергиин күүсетти. Тыва кижи хөөмей, сыгыт, каргыраа дыңнавас болза кандыг концерт турар - Николай Тумат хостуг салды. Уран номчулганын мастери, конкурстарның каш дакпыр тиилекчизи Дарташ Монгуш Улустуң чогаалчызы Кызыл-Эник Кудажынын «Херээженге йөрээл» деп алдарлыг шүлүүн номчуп күүседирге уян улус ыглажып, Василий Монгуштун шоодуглуг шүлүктерин күүседирге бүдүн зал каттыржып олурганнар. Уран чаяалганың күжү ол хире-дир! Солун концертти тургузуп база башкарыкчылаан Владимир, Вера Сереннернин өг-бүлезинге көрүкчүлер өөрүп четтиргенин илереткеннер.
Солун концертиң өске бажың- интернаттарга бараалгадып, үнүүшкүннер кылыр деп хоочуннар саналдааннар.