Шагаа таварыштыр Кызылдың хоочуннар бажыңынга «Чоннуң диктантызы» деп хемчег эрткен

Шагаа дээрге тыва улустуң эң-не ыдыктыг болгаш үндезин байырлалы болганда, хоочуннарывыс, улуг назылыг улустарывыс төрээн дылывыстын, ёзу-чаңчылдарывыстын кадагалакчылары болгай. Ынчангаш Шагаа таварыштыр Кызылдың хоочуннар бажыңынга Тываның гуманитарлыг шинчилелдер институдунуң дыл бөлүүнүң эртем ажылдакчылары, удуртукчузу Надежда Чылбаковна Серээдар биле аалдап кээп чорааннар. Ужуражылга үезинде «Чоннуң диктантызы» деп хемчегни эрттирип, «Алдын-кыстың Шагаазы» деп эгелиг диктантыны хоочуннар болгаш ажылдакчыларга бижиткеннер. Негелде ёзугаар 10 хоочуннар ук хемчегге улуг сонуургалдыг киришкеннер. Оларның 
эң улуг назылыг киржикчилери - 84 харлыг Салчак Долума Хертековна, 82 харлыг Сонам Тана Иргитовна.
Улуг назылыг Эне -биле чолукшулга ёзулалын база кылып,
ном саңывыска чаа номнарны эртемден Н.Ч.Серээдар библиотекарь Л.Т.Донгакка хүлээткен. Хоочуннар тыва чаңчылдар болгаш тыва дылывыстың дугайында солун сактыышкыннарын чугаалап, эртем ажылдакчыларынга өөрүп четтиргенин илереткеннер.