Саая Чечекмаа Акимовнаның өөнүң ээзинге тураскаадып бижээн шүлүү

Бистиң бажың-интернаттың чурттакчызы Саая Чечекмаа Акимовнаның өөнүң ээзинге тураскаадып бижээн шүлүү. Өөнүң ээзи аар аарааш, каш ай бурунгаар бо өртемчейден чоруй барган. Кады чоруур эжиңерни үнелеп, камнап, хүндүлеп чоруңар!

ЧОРУЙ БАРДЫҢ

Чоруй бардың. Сооңдува кышкы соок хат дүвүлеп тур 
Чоруй бардың. Чааскаанзырап, кударалдан өлүр четтим. 
Чоруй бардың. Даянгыыш чок, идегел чок артып калдым. 
Чоруй бардың. Салымымның багындан мен салдындым-на. 

Эжим чорда. Чоргаар-даа мен, шупту билир. 
Эжим чорда. Бергелерге торулбадым. 
Чалгыны чок куш ышкаш ужуп чадап туруп бердим. 
Чүге мени каапкаш бардың, бүзүрелим, багай эжим. 

Соок кышты аарыынга дөмейлээр мен. 
Кээргел чок, өлүмдүве чыгай бээр-дир 
Сээң-биле хилинчекти чүктедивис, эрттирдивис. 
Кымга чанныр, кымга сөглээр, куурумчу аарыгны.

Чоруй бардың. Мени мана, чеде бээр мен. 
Чоруй бардың. Мегечи бо делегейге каапкаш бардың.
Чоруй бардың. Канчап черле туруп келийн?
Чоруй бардың. Эжим сени чоктап, сактып чыдып калдым. 


29.01.2018 ч. 
Саая Чечекмаа