Салим Сазыгович Сүрүң-оолдуң «Авазынга даңгырак» деп тоожузунга ужуражылга эрткен

А. С. Пушкин аттыг национал ном саңынга чурт-шинчилел чогаалы болгаш национал библиография килдизиниң ажылдакчылары, май 29-туң хүнүнде, ээлчеглиг «Чылыг сөстүң одаа» деп бөлгүмге, Тываның Улустуң чогаалчызы Салим Сазыгович Сүрүң-оолдуң «Авазынга даңгырак» деп тоожузунга ужуражылга - ажык чугааны эрттирген.

Ужуражылга-ажык чугааны Тываның В. Ш. Көк-оол аттыг хөгжүм-шии театрының аныяк артизи Сай-Дажы Намдан «Ачамга» база «Улуу-биле четтирдим» деп Аржаан Ооржактың шүлүктериниң аянныг номчулга-биле эгелээн. Ук хемчегге сонуургап келгеннер: Тываның Улустуң чогаалчызы Шаңгыр-оол Суваң чогаалчы-биле чоок кылдыр эдержип чораанын ооң чүгле чогаалының дугайында эвес, а авторнуң бодунуң сактыышкыннарын сонуургадып чугаалаан, дараазында Сарыг-Септиң С. К. Тока аттыг № 2 дугаар школазының тыва дыл, чогаал башкызы, чогаалчының чаңгыс чер - чуртуу Саяна Маскай-ооловна өөреникчилеринге араганың уржуктарының хоразын үргүлчү чугаалап чоруурун, «Араганың кырынга чам үнер», арагадан бир-ле дугаарында өг-бүле хоозураар дээрзин демдеглээн, чогаалчы Раиса Ховалыг ынак чогаалчызы С. Сүрүң-оолга тураскаадып, бодунуң чогааткан шүлүүн номчукчуларга бараалгаткан.

Хемчегге Кызылдың кырганнар болгаш инвалидтер дазылга бажыңының ном саңының ажылдакчызы Людмила Донгак чогаалга сонуургалдыг хоочуннар-биле ажык чугаага идепкейлиг киришкеннер. Шангыр Ондар араганың хоразын болгаш чедирер салдарын уран номчулгага дамчэыткан.

Арага... Шак бо ыт ишпес ажыг сугну ижиптерге, кижини долгандыр турар чүүлдер доозазы уттундура бээр, бажың-балгат, ажы-төл, чырык чаагай күзелдер, алган кадай, ажыл-агый... Ада кижи кандыг болур ужурлугул? Амыдыралда бүгү чүүлдү уттупкаш, арагаже дүлдүне берген адалар ажы-төлүнге үлегер болуп шыдаар бе? деп айтырыгга кижи бүрүзү бодунуң дүвүрелин сагыш-сеткилинден үлешкен.

Келген аалчылар «Авазынга даңгырак» деп тоожу тыва чогаалда арага темазын чидии-биле кѳргүскен чогаал дээрзин база катап бадыткап, аңаа хамаарыштыр боттарының үзел-бодалдарын илереткеннер.