Тыва национал Шагаа байырлалы: «Хөглүг аал»

Тыва национал Шагаа байырлалы: «Хөглүг аал»

Хөглүг аалга чыглып алгаш,
Хөглээлиңер, ойнаалыңар.
Чаңчылдарны сагывышаан -
Амырлажып, мендилежип.
Чыглып келген аалчыларга.
Байырлалды бараалгадыыл!

Чаа чылды уткуур бүдүү хүнде бистиң дазылга бажыңга баштак-хөглүг, эрес-омак хоочуннарывыстын салгалдан салгалче дамчып келген тыва чоннуң ёзу-чаңчылдары сиңген "Хөглүг аал" мөөрейиниң ажыдыышкынын дазылга бажыңда эмчи сестразы Чечена Ламажааның үлегерлиг, буянныг өг-бүлези, чаптанчыг оолдары, уруглары-биле чараш оюн-көргүзүү-биле ажыткан.
Аал-чурт тайбың болзун, үнүш-дүжүт элбек болзун, азыраан мал хүр турзун деп күзээн бодалдар сиңген йөрээлдер, чалбарыглар, чолукшулга ёзулалы, ада-өгбелеривистиң ыдып чораан тоолдары, ырлажып чораан аян ырлары, чиге сөглээн суртаал үлегер домактары, угаан- бодал сайзырадыр тывызыктары, чечен чугаалары, кожумакка кончуг- ла мен дээш бадырган кожаңнары, дүрген чугаа, узун тыныш, хомуска, чадаганга, игилге уярадыр ойнаан аялгалар үзүктел чок диңмиттелген.
Хөглүг аалдың киржикчилери, чоргаарланыр хоочуннарывыс Кертик Ондар, Шагдыр- Сүрүн Сат, Василий Монгуш, Шангыр Ондар, Анай- оол Марти- оол, Данов Серен, Саара Шалык, Нина Очур, Виктор Сат, Сайын Ондар, Кок-кыс Куулар чараш оюн-көргүзүглери-биле шииткекчилерниң, көрүкчүлерниң сонуургалын чаалап алганнар.

Тыва чон шаандан бээр хүндүлээчел, демниг, үнген-кирген чоннуг, холу чемзиг, элбек аъштыг-чемниг чон.
Хөглүг аалдарның киржикчилериниң элбек, чаагай делгээн тыва чемнериниң делгелгези байырлалды улаштыр каастаан. Эргим сүттүг шайы- биле аалчыларны уткуп, эм оъттардан кылган шеңнелиг, ыт- каттыг шайлар, чыжырганадан кылган чулук, ак чемниң шупту дээжизи, хырбачадан кылган мүн, кара мүн, далган ускен мүн, соктаан далган, тараа, согажа, ужа, төш, ханның шупту хевирлери, быжырган боова- боорзак, хуужуурлар дыка- ла элбек, амданныг, чаагай болду.
Эр- хейлер, хоочуннар!
Шагаа- биле,өгбелерим,
Шагаа- биле, эргимнерим,
Шагаа- биле, тыва чонум,
Шагаа- биле, курай- Курай!

"Хөглүг аал" мөөрейниң шииткекчилери А. С. Пушкин аттыг Национал ном саңының ажылдакчылары Уран Торжу уруу Донгакка, Мария Мандан уруу Ооржакка база салым- чаяанныг оолдарлыг, кыстарлыг Кызыл хоорайның үлегерлиг, буянныг Чечена, Анатолий Ламажааларның өг- бүлезинге өөрүп четтиргенивисти илереттивис.

Хемчегге көрүкчүлер, аарыкчылар болгаш киржикчилер- биле 110 хоочуннар хаара туттунган.