«Шүлүктерим хөөнү болуп куттулуп чор, төрээн Тывам!» деп моорей болуп эрткен

«Тыва дылдың, тыва чогаалдың мерген чогаалчызы» деп үнелээривис, Тываның Улустуң чогаалчызы, Россияның болгаш Тываның чогаалчылар эвилелиниң кежигүнү Александар Алексвандрович Даржай төрээн Тывавыска тыва дыл хүнүн тургузарының кол сумелекчизи болуп турар. Ынчангаш, Тыва Республиканың Чазааның доктаатканы-биле Тывага ноябрь 1-ниң хүнүн тыва дылдың хүнү кылдыр чарлаан.
Кызыл кожуунуң төп модельдиг ном саңынга чогаалчының 80 хар харлаан юбилейинге тураскааткан «Шүлүктерим хөөнү болуп куттулуп чор, төрээн Тывам!» деп уран-чечен номчулга мөөрейи болуп эрткен.
Келген аалчыларга ном саңының ажылдакчылары чогаалчының допчу намдарын болгаш номнарын кысказы-биле таныштырганнар. Мөөрейге хоочуннар бажыңының төлээлери, № 1 болгаш № 2 ортумак школаларның башкылары идепкейлии - биле киришкеннер.
Тыва Республиканың алдарлыг башкызы, хоочун башкы Өнермаа Курбааевна Ондар удурткан шииткетчилерниң бөлүү түңнелди үндүрүп ажылдааннар.
1-ги черни- Ондар Караймаа Караанайовна, № 2 школанын башкызы;
2-ги черни- Монгуш Дарташ Дажыевич, хоочуннар бажыңының төлээзи;
3-ку черни – Ондар Шаңгыр Алдын-ооловна, хоочуннар бажыңының төлээзи чаалап алганнар. Тускай шаңналдарга хоочуннар бажыңының ажылдакчызы Донгак Людмила Төмүр-ооловна база № 1 школаның башкызы Даргый-оол Саяна Допур-ооловна төлептиг болганнар.