Виктор Сагаан-оолдуң 100 харлаан оюнга тураскааткан «Чуртталгамның оңнери» деп хемчег болуп эрткен

Кызыл кожууннуң модельдиг төп ном саңының аалчылары болуп, Виктор Биче-оолович Сагаан-оолдуң 100 харлаан оюнга тураскааткан «Чуртталгамның оңнери» деп литература-хөгжүмнүг сактыышкын хемчегге кириштивис.

Хемчегни чогаалчының «Күдер-хүрең оглу-ла мен» деп чараш шулуу-биле ажыткан.
Кежээниң хундулуг аалчылары: чогаалчының улуг уруу дээди категорияның даштыкы дыл башкызы Мария Викторовна Сагаан-оол уйнуу Байкара Олча-биле, Тыва Республиканың культуразының алдарлыг ажылдакчызы Зоя Доржуевна Монгуш, Тыва Республиканың улустуң чогаалчызы Куулар Черлиг-оол Чашкынмаевич, Тываның чогаалчылар эвилелиниң даргазы, литература шинчилекчизи Комбу Сайлыкмаа Салчаковна, Тыва Республиканың улустуң чогаалчызы Шангыр-оол Суван Монгушович, Россия Федерациязының алдарлыг журнализи Шоюн Александр Сан-оолович, Тыва Республиканың культуразының алдарлыг ажылдакчызы Серен Владимир Бюрбюевич, уран-чүүлдүң тергиини, Өвүр кожууннуң алдарлыг артизи Арат-оол Алексей Монгушович, Каа-Хем суурнун хундулуг хоочуннары база Кызылдын улуг назылыглар бажыңының хоочуннары бистер болдувус.

Чараш кежээни ыры-хөгжүм-биле каастап, чогаалчывыстың шүлүктеринден чараш, уян аялгаларга үдеткен ырыларны Кызыл кожууннуң артизи, «Аян тудаал» ансамбльдин солизи Мандып-оол Сылдыс-оол Анай-оолович, уран чүүлдүң тергиини Арат- оол Алексей Монгушевич ырлап күуседирге келген аалчылар катчып, кады ырлаштылар.

Мария Викторовна ачазының дугайында, оон амыдыралындан кезектерни чугаалап сонуургаткан база чалатырган хүндүлүг чогаалчылар сактыышкыннары-биле үлешкен. Улуг чогаалчы Куулар Черлиг-оол Чашкынмаевич «Шүлүкчүнуң 100 чыл оюнга» деп чараш шүлүктү Виктор Биче-оолович Сагаан-оолга тураскаадып чогааткаш чыылган чонга бараалгаткан.
Онзагай салым- чаяанныг чогаалчывыстың сактыышкын кежээзинден ырлыг- шоорлуг, каткы- хөглүг чанып келдивис.
Улуу- биле четтирдивис ном саңының ажылдакчыларынга!