Чуртталгага ынаам кончуг!

Чуртталгага ынаам кончуг!

Россияның болгаш ТР-ниң чогаалчылар Эвилелдериниң кежигүнү, уруглар эмчизи, классиктиг гомеопатияның доктору Зинаида Салчаковна Серен-Чимиттиң 65 харлаанынга тураскааткан, "Чуртталгага ынаам кончуг!" деп чогаадыкчы ужуражылгазы үндезин тыва культура Төвүнге бедик деңнелге, сагыш сеткил көдүрлүүшкүннүг болуп эрткен.
Кежээниң маадыры Зинаида Серен-Чимиттиң төрүттүнген чери Бай-Тайганың чурумалдыг бойдузунга, ада-иезинге болгаш уруг-дарыынга база мөңге тема - ынакшылга тураскааткан шүлүктери, ооң сөстеринге бижиттинген ырлары чыылганнарны өөрткен.
Ол сес номнарның, ооң иштинде фэнтези жанрынга бижиттинген "Хуулгаазын ак аъттыг кыс", "Өске орандан оол" деп орус, тыва дылдарда номнарның автору.
Чогаалчының бичии уругларга бижээни шүлүктерин уйнуктары номчуп, ырыларны Кызылдың 30 дугаар уруглар садының чаштары башкызының үделгези-биле белек кылдыр сөңнээннер. Национал хөгжүм-шии театрының, Тываның ойнаар-кыстар театрының артистери, "Саяннар" ыры болгаш танцы театрының самчылары Ховар, Чинчи Салчактар болгаш өскелер-даа чогаадыкчы кежээге киржип, З.С.Серен-Чимиттиң шүлүктерин номчуп, ырыларын ырлашканнар. Чогаалчы бодунуң элээн каш шүлүктерин номчаан.
"Чуртталгага ынаам кончуг" деп чогаадыкчы ужуражылга бедик деңнелге эртти. Ховар салым- чаяанныг чогаалчывыстың ам- даа солун номнары үнуп, мөгейикчилерин өөртсүн"- деп хоочуннар күзээн.