Россияның парлалга хүнүн таварыштыр бөгүн бистиң дазылга-бажыңывыстың аалчылары - Кара-Күске Күнзекович Чооду база Александр Сан-оолович Шоюн

Россияның парлалга хүнүн таварыштыр бөгүн бистиң дазылга-бажыңывыстың аалчылары - алдарлыг Эзир-Караның чурту - Тес-Хемниң акаалары Кара-Күске Күнзекович Чооду база Александр Сан-оолович Шоюн. Назы-хар талазы-биле элээн дөгүй-даа берген болза, ам-даа идепкейлиг амыдыралдың агымында, үе-биле деңге чаржып чоруур, улустуң чогаалчызы, Тыва Республиканың алдарлыг ажылдакчызы, шүлүкчү, чогаалчы, журналист Кара-Күске Күнзекович бодунуң чогаадыкчы ажылын хоочуннарга таныштырган. Россияның журналистер эвилелиниң кежигүнү, «Сылдысчыгаш» солуннуң үндезилекчилериниң бирээзи база хөй чылдарда редактору Александр Шоюн бодунуң чугаазын видеокөргүзүглер-биле согажалап тургаш көргүскени хоочуннарга улуг сонуургалды болдурган. Александр Сан-ооловичтиң чангысклассчызы, бистиң бажыңывыстын чурттакчызы Сат Виктор Демир-Хаяевич Кара-Күске Чоодунуң сөзүнге бижээни «Мен тыва мен» деп ырыны күүсеткени ужуражылганы каастаан. Тываның база билдингир чогаалчылары-биле ужурашканы дээш хоочуннар өөрүп четтиргенин илередип, чогаадыкчы чедиишкиннерни күзээннер.

#чоодукаракуске #александршоюн #чогаалчы #кызылскийдоминтернат #ветераны #болчагшагы #ужуражылга #старшеепоколение #демография