Хоочун өгбелер-биле Кызылдың башкы колледжиниң сургуулдары «Салгалдарның харылзаазы» деп төлевилелдиң ажылын уламчылап, ажык чугааны кылганнар.

Хоочун өгбелер-биле Кызылдың башкы колледжиниң сургуулдары «Салгалдарның харылзаазы» деп төлевилелдиң ажылын уламчылап, узун назылыглар хүнүнүң бүдүүзүнде ужуражып, ажык чугааны кылганнар. Чажындан тура хоочун салгалдарның билиг-мергежилинге, амыдыралчы арга-дуржулгазынга үндезилеттинген, сургаал уткалыг үлегер домактарны шиңгээдип ап, өг-бүле кижизидилгезинге салдары, ужур-дузазы ажыктыын көрүп өзүп келгенин, ада-иезинден, улуг назылыг өгбелерининден үлегер домактарны дамчыштыр чөптүг болгаш чөптүг эвес чүүлдерни ылгап билип, быжыг туруштуг, арыг ак сеткилдиг, шынчы чорукка өөренип алганын хоочун өгбелер чугаалап, ажыктыг сүмелерни бергеннер. Шангыр Ондар, Кертик Ондар херээжен кижинин дугайында шүлүктерниң уран номчулгазын онза чараш демдеглээни, Тана Сонамнын тааланчыг аныяанда ырлап чораан ырыларын ынак хөгжүм херексели домрага ойнап тургаш ырлааны, Чечекмаа Сааяның дагестан чоннуң танцы-самын бараалгатканы, Людмила Донгактын «Ынак авам» деп ырызы, өртемчейде солуттунмас чангыс кижи – авага тураскааткан концертин хоочуннар сургуулдарга бараалгатканнар. Ажык чугаага улустун аас-чогаалының үлегерлери-биле кижизидилгениң дээштиг хевирлерин ажыглаары бо уеде дыка чугула деп түңнээн. Ол бирээде, ада-өгбелеривисти хүндүлеп турарывыс болур, ийиде, кижизидилгениң нарын айтырыгларын шиитпирлээринге улуг ужур-дузаны ап чоруур, үште, дыл-домаавыс сайзыраарынга, чугаа-домаавыс сагынгыр-тывынгыр, чечен-мерген болурунга өөредир. Ужуражылга шайлаашкын болгаш «Хоочуннарның угаадыглары» сумелерлиг буклет үлелгези, танцы-сам-биле төнген.